MICHELE BATTAGLIA è nato a Lercara Friddi (Pa) il 7-10-1901. laureato in medicina, ha intrapreso la carriera di medico militare. A partire dagli anni ’80 ha iniziato la sua attività poetica.
Ecco alcuni suoi scritti, scelti per voi da L’ALTRA SCIACCA:
IL PARADISO E L’INFERNO SONO SU QUESTA TERRA
La donna è u paradisu nta sta terra
E l’infernu è la morti, ‘un ci sù santi.
Iddi dù suli, sunnu li putenti,
e nui semu li pupi cu li tranti.
Sù li nostri pupari eternamenti,
giramu attornu ad iddi ad ogni istanti,
l’amuri cu la morti sù parenti,
quannu muremu, doppu, un c’è cchiù nenti.
Nun dumannari a nuddu lu pirchì,
lu comu e quannu l’omu accumparì,
unn’è chi va, qual è lu so distinu.
Nun dumannari mancu a lu parrinu.
Nun sù dumanni pi la nostra testa,
attaccati all’amuri e facci festa.
La donna è paradisu, a tia ti basta.
NON SI RITORNA
La vita nun finisci e mai s’astuta,
pirchì è focu di stidda e di pianeta,
l’omu nun torna chiù pi n’atra vita,
sunnu li figghi sò, l’atra fattata.
Nun torna nuddu, doppu ch’è cunzatu,
doppu ca nna la cascia è sistimatu,
ma si chiovi e lampia, nasci lu mitu,
si vola na farfalla, iddu è biatu.
Murennu tutti quanti nta na vota,
nun c’è pi lu ritornu, nudda strata.
E nun si ferma mai la nostra rota.
UN LIBRO SEMPRE CHIUSO ovvero SEMPER IGNORABIMUS
Nun grapiri stu libru, è sempri chiusu,
è megghiu nun ci mettiri lu nasu,
d’unnè chi nui vinemu e unnè chi ghiamu,
c’è scrittu tuttu, e chiddu cu un sapemu.
È megghiu d’accussì, tu cridi a mia,
la vita è tutta quanta fantasia,
s’astuta e adduma quannu pari a idda.
Si l’omu sapi ca dumani chiovi,
perdi lu gustu pi li cosi novi.
Nun grapiri stu libru, ascuta a mia,
ma mettiti lu cori in allegria.
Quannu t’arriva ‘ntesta la mazzata,
calati iuncu, e idda è già passata.
La dignità pi l’omu è prima cosa,
è comu lu profumu pi la rosa.